Меѓу многуте критики кон социјалните мрежи често се споменува изложеноста на алгоритамска содржина, т.е. објави, фотографии и видеа за кои алгоритмот мисли дека би можеле да ви се допаднат. Честопати, ова е содржина што ви се прикажува само за да ве држи залепени за вашите екрани, а која можеби дури и не сте ја побарале. Покрај фактот дека таквата содржина може да има негативен ефект врз некои корисници (особено помладите, што е една од причините за забраната на социјалните мрежи во Австралија), таа може да ги зароби и во еден вид алгоритамски меур во кој се прикажува само одреден тип содржина.
Со текот на времето социјалните мрежи, првенствено поради јавниот притисок и предупредувањата од експертите за негативното влијание на ваквите платформи и алгоритми, воведоа некои промени за да им дадат на корисниците поголема контрола врз содржината што им се прикажува, а Instagram сега направи уште еден голем чекор во таа насока.
Новата алатка, наречена „Your Algorythm“, им овозможува на корисниците да избираат теми и да влијаат на препораките и да ја прилагодуваат содржината за да им прикажуваат видеа што се повеќе во согласност со нивните интереси.
Кога оваа функција ќе стане достапна, во горниот десен агол на Reels ќе се појави икона што изгледа како две линии со срца, а со допирање на неа ќе се отвори опцијата за управување со алгоритамска содржина. Таму ќе видите теми за кои Instagram смета дека можеби ве интересираат, врз основа на вашите претходни активности. На пример, описот може да каже дека вашите неодамнешни интереси се поврзани со креативност, спорт, фитнес и слично, а под тоа ќе има список на такви теми врз основа на тоа која содржина ви се прикажува. Секако, таму можете да изберете кои теми од понудените ви се навистина интересни, а кои не сакате премногу да ги гледате, а можете да додадете и нови теми или содржина што би сакале да ја видите повеќе во Reels.
На Tech Crunch потсетуваат дека слична опција беше воведена минатата година од TikToк.Сепак, постои една голема разлика помеѓу опциите за управување со содржини на TikTok и Instagram. Додека на корисниците на TikTok им се нудат однапред дефинирани категории, таа листа на Instagram е персонализирана и корисниците можат да додаваат нови теми.
Опцијата за персонализирање на содржината на Reels е веќе достапна за корисниците во САД, а наскоро треба да биде достапна за сите.
Instagram вели дека ова е само почеток и дека оваа можност за прилагодување на алгоритмот на крајот ќе се прошири на табот Explore, како и на други места во апликацијата.
(Zimo)
