Експанзијата на вештачката интелигенција почнува да остава свој белег на пазарот на паметни телефони. Според најновата анализа од Counterpoint Research, растечката побарувачка за мемориски чипови во центрите за податоци со вештачка интелигенција веројатно ќе предизвика зголемување на цените на телефоните во 2026 година, а во исто време ќе се намалат и испораките.
Counterpoint сега очекува глобалните испораки на паметни телефони да се намалат за 2,1% во 2026 година, што е значително пресврт во однос на претходната прогноза за рамен или скромен раст. Иако испораките не претставуваат директно продажба до крајните клиенти, тие се сигурен показател за побарувачката бидејќи го следат обемот на уреди што влегуваат во продажните канали.
Во исто време, просечната продажна цена на паметните телефони би можела да се зголеми за дури 6,9% годишно, што е речиси двојно повеќе од претходната проценка од 3,6%. Клучната причина за ова поместување лежи во зголемувањето на цените на компонентите, предизвикани од тесни грла во синџирот на снабдување со полупроводници.
Главниот притисок доаѓа од секторот за вештачка интелигенција. Масовната изградба на центри за податоци низ целиот свет ја зголеми побарувачката за Nvidia системи, кои во голема мера се потпираат на меморијата од SK Hynix и Samsung, двата најголеми производители на мемориски чипови. DRAM, клучна компонента и за AI серверите и за паметните телефони, е особено тешко погодена. Бидејќи понудата не успева да го следи темпото на побарувачката, цените на DRAM нагло се зголемуваат оваа година.
За телефоните во понискиот ценовен сегмент, под 200 долари, трошоците за производство по уред се зголемија за помеѓу 20% и 30% од почетокот на годината. Сегментите од средна и висока класа се соочуваат со зголемување на трошоците за материјали од 10% до 15%. Counterpoint предупредува дека цените на меморијата би можеле да пораснат за уште 40 проценти до вториот квартал од 2026 година, со што вкупните трошоци за производство ќе бидат од 8% до повеќе од 15% над веќе покачените нивоа.
Таквиот притисок речиси сигурно ќе се пренесе на крајните потрошувачи. Повисоките цени на компонентите значат повисоки малопродажни цени, што го објаснува прогнозираниот скок на просечните цени на телефоните.
Според МС Хванг, директор за истражување во Counterpoint, Apple и Samsung се во најдобра позиција да го издржат наредниот период благодарение на повисоките маржи и силната контрола на синџирот на снабдување. За другите производители, особено оние што работат со помали маржи на профит, рамнотежата помеѓу зачувувањето на пазарниот удел и профитабилноста ќе биде многу потешка.
Се очекува најголемиот притисок да падне врз кинеските производители, кои доминираат во средните и ниските ценовни опсези. За да ги ублажат растечките трошоци, некои компании може да прибегнат кон компромиси, како што се послаби камери, дисплеи или аудио компоненти, како и повторна употреба на постари делови. Во исто време, производителите веројатно ќе се обидат поагресивно да ги промовираат поскапите модели, со цел да ја заштитат профитот во услови на растечки трошоци.
(Benchmark.rs)
