Реалните плати во Европа продолжија да се опоравуваат по остриот пад предизвикан од инфлацијата во 2022 година, а прогнозите покажуваат дека растот на платите, прилагоден на инфлацијата, во 2026 година ќе биде дури и малку повисок отколку во 2025 година.
Според податоците од Европската централна банка, номиналните плати во еврозоната растат побрзо од цените веќе некое време, што значи дека граѓаните повторно имаат поголема куповна моќ. На почетокот на 2025 година реалните плати во еврозоната речиси ги достигнаа нивоата забележани пред инфлаторниот шок кон крајот на 2021 година, објавува Euronews Business.
Иако ОЕЦД сè уште не објавила компаративни податоци за 2025 година, анкетите на пазарот на трудот даваат јасен увид во трендовите. Извештајот „Трендови на платите 2025–26“, подготвен од организацијата Услови за вработување во странство (ECA), покажува дека реалните плати се зголемиле во речиси сите европски земји во 2025 година, а овој раст треба да продолжи и следната година.
До крајот на 2025 година, реалните плати ќе растат во 23 од 25 анализирани европски земји. Исклучок се Романија, каде што се очекува пад од 0,9 проценти, и Украина, со пад од 3,2 проценти. Во другите земји растот се движи од скромни 0,2 проценти во Австрија до дури 5,1 процент во Турција.
Прогнозите за 2026 година се дополнително поволни за економиите на Источна Европа. ЕЦА очекува средниот раст на реалните плати да биде 1,7 проценти, во споредба со 1,4 проценти во 2025 година. Сите земји освен Романија треба да забележат позитивен тренд, додека Унгарија, Полска, Чешка и Бугарија ќе бидат меѓу најуспешните.
Според авторите на извештајот, Источна Европа продолжува да ги надминува западните земји благодарение на побрзиот економски раст и повисоките зголемувања на продуктивноста.
Резултатите се базираат на анкета на 200 мултинационални компании спроведена помеѓу август и октомври 2025 година, користејќи ги проекциите за инфлација од извештајот на Меѓународниот монетарен фонд.
(Bizlife)
