Германскиот производител на луксузни автомобили Порше објави дека неговиот оперативен профит нагло се намалил од речиси 5,3 милијарди евра во 2024 година на само 90 милиони евра минатата година, првенствено поради послабата продажба во Кина и зголемувањето на американските царини. Оперативниот профит на Порше за 2025 година, вклучувајќи ги и финансиските услуги, е 413 милиони евра, што е исто така голем пад во споредба со 5,6 милијарди евра во 2024 година.
Вкупните приходи се намалиле за речиси 10 проценти на 36,3 милијарди евра, додека оперативната маржа се намалила од 14,5 проценти на само 0,3 проценти, објави Виршафтсвое. Фолксваген вели дека главните причини за лошиот резултат се „фундаментално променетата пазарна средина во Кина, американските царини, побавниот премин кон електрични возила и еднократните специјални трошоци“.
Падот на профитот делумно бил ублажен со започнатата програма за штедење и елиминацијата на околу 4.000 работни места, се додава во извештајот.
Во јануари, на чело на Порше дојде поранешниот шеф на Мекларен, Михаел Лајтерс, за кого се очекува подобрување на резултатите. Порше сè уште очекува намалување на продажбата во 2026 година, но прогнозира дека маржата на оперативната добивка ќе се зголеми на повеќе од пет проценти.
Фирмата вели дека ќе се фокусира повеќе на модели со мотори со внатрешно согорување поради недоволната побарувачка за електрични спортски автомобили во Кина.
(B92)
Фото – Wikimedia
