Колку пати сте се нашле во ситуација кога електронската пошта ви е преполнета со пораки од клиенти, соработници и дигитални флаери? Во вакви ситуации секој од нас би посакал некого кој ќе ни ја среди целата комуникација. Но живееме во дигитална ера и за среќа, постојат многу алатки кои ќе ви помогнат да си ги организирате задачите, комуникацијата и делењето на информации помеѓу тимовите и клиентите.
Ви претставуваме четири алатки кои ќе ви ја зголемат продуктивноста на тимот и ќе ви ја олеснат комуникацијата и соработката
Slack е доста популарна апликација и добро дизајнирана платформа која нуди инстант пораки, пренос на податоци и одлично пребарување на пораките. Голема предност е што можете да додадете повеќе тимови и да комуницирате лесно со секој тим посебно само со еден клик. Исто така, алатката овозможува интеграција со други алатки како Trello, Intercom, Asana, Google Drive итн. Достапен е на поголемиот дел од платформите како Windows, Mac, Linux, Android и iOS.
Asana е една од најпрепознатливите алатки кога се работи за управување со проекти, задачи и рокови. Платформата им овозможува на корисниците да доделуваат задачи на други членови, да додаваат следбеници на проектите и да ги следат роковите. Апликацијата е корисна за креирање листа со обврски или календар за стратешко планирање.
Trello е уште една алатка за управување со проекти. Платформата ви овозможува работа со картички на кои се запишуваат задачите и нудат прегледност на целокупниот проект. Во картичките може да впишувате помали задачи и да делегирате помеѓу колегите кои сте ги приклучиле на проектот. Постои и можност за да додавате коментари на картичките за побрз начин на добивање повратна информација од другите соработници. Trello исто така нуди можност за интеграција со други алатки.
Google Docs е можеби најпознатата од овие алатки. Ова е една од низата корисни алатки на Google и е доста едноставна за работа поради сличноста со пакетот Microsoft Office. Но она според што Google Docs се истакнува е тоа што работата ви е зачувана автоматски, а на истиот документ истовремено можат да работат повеќе луѓе. Наместо да праќате документи посебно од еден до друг соработник, на Google Docs треба само да ја додадете електронската пошта на корисникот за да му дозволите пристап до документот и заедно да го уредувате.
