Со грант од ЕУ од 18 милиони евра и учество на Владата со 3,2 милиони евра ќе се подобрува конкурентноста на туризмот и ќе се чисти ѓубрето од туристичките места во Македонија.
Вториот јавен повик за доделување на грантови е веќе објавен. На него можат да конкурираат општините за инфраструктурни инвестиции, организациите од туристичкиот сектор, образовните установи и центрите за обука, како и локални мали и микро претпријатија од областа на туризмот.
Средствата се обезбедени од Европската Унија- 18 милиони евра преку ИПА 2, од Владата уште 3, со што вкупно за овој проект се обезбедени над 21 милиони евра.
Преку овој проект општините ќе можат да добијат до максимум еден милион евра ако настапуваат сами и до три милиони ако одат регионално. 90 отсто од парите ќе бидат грант, а 10 проценти сопствено учество. За локалните микро и мали претпријатија грантовите ќе бидат до 100 илјади евра за еден барател и до 300 илјади ако настапуваат заеднички, но кај нив само 50 отсто од парите ќе бидат грант. Граѓанскиот сектор, пак, за обуките ќе добива од 50 до 150 илјади евра, и таму грантот е 90 проценти.
Повикот трае до 30-ти април. Предност ќе имаат општините кои веќе имаат готови проекти, а оние што немаат подготвено проектна документација ќе добијат техничка помош.
