КОНСАЛТИНГ ИНТЕР ГРУП се сплотува со мисијата на Организацијата на жени на град Скопје за заеднички да го направиме насилството видливо и истото да го откорениме и отстраниме. Избраниот метод е преку запознавање на што поголем број граѓани за постоењето и функционирањето на Националната СОС линија за жртви на семејно насилство, достапна на 02/15 700.
Оваа Национална СОС линија за жртви на семејно насилство (02/15 700) постои од 1994 година. Жените кои посветено и со силен елан работат на неа, секојдневно обезбедуваат индивидуална и институционална поддршка за жртвите на семејно насилство.
Како семејно насилство се квалификува секое физичко повредување, заканување и заплашување со оружје, психичко малтретирање, омаловажување, наметнување сопствена волја со негирање на потребите на жртвата, одземање на финансиски средства, принудување на сексуален однос, недавање развод и покрај инсистирањето на жртвата.
Националната СОС линија за жртви на семејно насилство (02/15 700) функционира преку правно и психо-социјално советување на жртвата, поврзување со сите надлежни органи и институции, сместување во привремено засолниште и дури и со интервенција во полиција или брза помош доколку е потребно.
Досегашното искуство покажува дека потребата од оваа СОС линија е непроценлива и неретко, таа обезбедува најбрза асистенција во критичните моменти.
Од таа причина, КОНСАЛТИНГ ИНТЕР ГРУП со сите свои капацитети ги поддржува активностите на Националната СОС линија за жртви на семејно насилство (02/15 700), и тоа како финансиски, така и преку промоција на нивната работа, а со цел постигнување што поголема видливост во јавноста. Дополнително, на нашата веб-страница ќе биде поставен бројот на СОС линијата – 02/15 700.
Заеднички можеме да го надминеме проблемот на насилството. Помогнете си себе си и помогнете му на Вашиот близок. Притоа запомнете дека не сте сами и дека решение постои на 02/15 700.
