Компанијата „Декодикс“ поврзана со снаата на Цветанка Ласкова, има најмали шанси да ги добие 320-те илјади евра од грантот за иновации зошт добила проценка на граница на висок ризик. Мали шанси има и фирмата „Контура“ на Елена Донева, сопругата на поранешниот амбасадор Јован Донев, додека другите две фирми кои беа предмет на проценка – „Т- Сенс“ блиска до сопругата на актуелниот министер за култура, Асаф Адеми и „Микросам“ поврзана со поранешниот министер Веле Самак, се со понизок ризик од судир на интереси и со поголеми шанси да ги добијат парите за иновации. Ова го покажала процената на ризик кај четирите спорни фирми која за Фондот ја направи „Транспареси интернешнл – Македонија“.
Дали и која од фирмите ќе ги добијат грантовите во вредност 770.000 евра ќе одлучи Комитетот за одобрување на инвестиции на крајот на јануари.
Под притисок на јавноста од грантовите се повлекоа фирмите блиски до вицепремиерот Анѓушев и пратеникот Локвенец. Но на темата судир на интереси, Анѓушев смета дека државата губи со повлекувањето на неговите фирми од државните тендери и грантови.
Фондот во првиот повик додели грантови вредни 10,5 милиони евра. По допрен глас Јавното обвинителство отвори и предмет откако во јавноста беше објавено дека меѓу добитниците се фирми блиски до функционери.
