Книготека.мк е првата македонска дигитална книжарница за продажба на електронски книги каде што на едно место може да се најдат изданијата на голем број македонски издавачки куќи. Основната мисија на книжарницата е да ја доближат книгата до читателот на брз и едноставен начин воведувајќи го во новиот свет на модерното читање.
Читателите можат да изберат фонт, големина на текст и боја на екран, можат да подвлекуваат, да оставаат белешки и обележувачи во книгите. Пребарувањето на книгите се прави по одреден збор или фраза, а непознатите поими можат да се пребаруваат преку Google и Wikipedia. Прочитаните книги потоа може да се оценувааат и да се споделуваат на социјалните мрежи. По купувањето на секоја книга, истата може да се чита без интернет конекција.
„Го создадовме првиот агрегатор за електронски книги со цел да ги направиме книгите подостапни до читателите и да им овозможиме да читаат во кое било време, каде и да се наоѓаат во светот. Изреката ‘so many books, so little time’ повеќе не е изговор да не им се посветиме на книгите во овој брз и динамичен свет на живеење. Литературата е неопходна бидејќи нè прави попаметни и поотворени личности, а со Книготека го правиме читањето подостапно и поудобно од кога било“, вели Марија Ичокаева, раководител за административно и комерцијално работење во Книготека.мк.
Денес Книготека располага со околу 300 книги напишани од странски и домашни автори. Апликацијата е бесплатна и е достапна за сите мобилни телефони и таблети кои работат на iOS или Android. Треба само да ја симнете апликацијата, да се регистрирате и почнете со читање електронски книги.
