Илјадници продавници во Австрија повторно почнаа со работа вчера и земјата е една од првите во Европа кои ги олабавуваат сторгите мерки за стопирање на ширењето на корона вирусот. Но, австриската влада и понатаму на населението му потенцира дека не се спасиле целосно од оваа пандемија.
Австрија рано презеде мерки како затворање на училиштата, баровите, театрите, рестораните, не толку битните продавници и други места каде што може да се групираат луѓето. Тие мерки почнаа пред околу четири недели, а населението мораше да остане дома и да работи од дома ако е возможно.
Досега земјата има вкупно 368 починати, што е помалку отколку што некои други европски земји имаат во само еден ден. Дневно се појавуваат по само неколку нови случаи на заболени и се стабилизираше ситуацијата со хоспитализирањето.
„Економски, сакаме да излеземе од кризата што е можно побрзо и да се бориме за секое работно место во Австрија”, изјави канцеларот Себастијан Курц, кој е на чело на партијата на Зелените.
Минатата недела тој претстави детален план за повторно отворање на делови од економијата, почнувајќи со продавниците кои имаат површина до 400 квадратни метри, што е двапати повеќе отколку едно тениско игралиште, како и на некои центри за реновирање на домот и градинарство. После нив ќе следуваат шопинг центрите, поголемите продавници и фризерниците почнувајќи од 1 мај. Рестораните и хотелите прогресивно ќе се отвораат од средината на мај.
Останува нејасно дали со ограничувањето на бројот на луѓе кои ќе влегуваат одеднаш во продавница и обврската сите купувачи да носат маски Курц испраќа порака до населението да бидат внимателни.
Светската организација во петокот објави предупредување дека олабавувањето на рестрикциите во земјите може да резултира со огромен број смртни случаи, но не ја посочи конкретно Австрија.
И други западноевропски земји ги олабавуваат карантините, но на поинаков начин. Пред некој ден Шпанија дозволи некои активности како градежништво и производствениот сектор да продолжат, додека Данска ги отвора градинките и училиштата за децата од прво до петто одделение почнувајќи од денес.
