Македонските научници Љупчо Коцарев, Леонид Грчев, Валентин Мирчески, Рубин Гулабоски, Трајче Стафилов и Иван Грозданов се најдоа на листата на топ 2% научници во светот, која што ја изработи тричлен тим предводен од проф. д-р Џон Јоанидис од Универзитот Стендфорд во САД. Листата е објавена во рамките на трудот „Updated science-wide author databases of standardized citation indicators“ во научното списание „PLOS Biology“.
Студијата вклучува рангирање на над 7 милиони научници од целиот свет од 22 научни области и 176 под-области, од кои е направена листата од над 150.000 научници врз основа на голем број на комбинирани библиометриски индикатори, без да се земе во предвид возраста на научниците, објави грчкиот јавен сервис ЕРТ.
Инаку, професорот Љупчо Коцарев во моментов е актуелен претседател на Македонската академија на науките и уметностите (МАНУ), Леонид Грчев е професор и академик во МАНУ, Рубин Гулабоски е професор на Универзитетот „Гоце Делчев“ во Штип, додека Трајче Стафилов, Валентин Мирчески и Иван Грозданов се професори на Институтот за хемија при Универзитетот „Св. Кирил и Методиј“.
(Meta.mk)
(фото: Plos Biology screenshot)
