По успешната соработка на првите две сезони од серијата „Ѕвездени патеки: Откритие“, „Фх3х“ ја заврши работата на третата сезона, во која работеше од четвртата до тринаесеттата епизода.
Третата сезона на оваа популарна американска серија го следи екипажот на УСС Дискавери во авантури во иднината, скоро еден милениум по настаните во оригиналната серија. Оваа сезона е во продукција на „Си-би-ес телевижн студиос“ и започна со премиерно прикажување на Си-би-ес на 15 октомври 2020, а ќе се прикажува нова епизода секоја недела до 7 јануари 2021 година. Во октомври оваа година беше најавена и четврта сезона.
Овој проект „Фх3х“ веќе три сезони го потпишува како одговорна за визуелните ефекти, а годинава на одјавната шпица, покрај „Фх3х“ и Канадскиот филмски фонд за подршка, се појавува и Агенцијата за филм на Република Северна Македонија, за продукциската поддршка. Ова е првпат Агенцијата за филм да се потпише на проект од највисоката А продукција и самото појавување ќе привлече многу внимание во холивудските продукциски компании.
– Оваа сезона на „Стар трек; Дискавери“ е прва серија која речиси целосно се прави со визуелни ефекти, а чија пост-продукција се правеше во услови на светска пандемија. При тоа, уште од самиот почеток во „Фх3х“, благодарејќи на нашиот ИТ-тим, успешно беше аплициран системот за даличинско работење, кој ги задоволува високите стандарди барани од холивудскте продукции. Со ова нашите вработени можеа да работат од дома без да се изложуваат на дополнителни ризици.
Вообичаено, визуелните ефекти за една епизода се изработуваат за десет месеци, но заради пандемијата работата траеше подолго, особено што заради прекинот на снимањата некои кадри беа комплетно изработувани компјутерски, за да се исполнат барањата на продукцијата – изјави Миливоје Ѓорѓевиќ, коосновач на „Фх3х“.
Извор – Нова Македонија
