Сајтовите на најголемите светски медиуми утринава беа недостапни

Голем број интернет страници во светот, меѓу кои и на британската влада и на познати светски медиуми, утринава беа недостапни поради грешка на американски клауд-сервис.

Интернет страниците на повеќе светски медиуми, како Њујорк Тајмс, Фајненшл Тајмс, Би Би Си, Блумберг, Си Ен Ен, Ел Монд, Гардијан, платформата Редит, како и сајтовите на британската влада со наставка gov.uk утринава кратко време беа недостапни. Не можело да се пристапи и до интернет сајтот за продажба Амазон.
По кратко време сајтовите повторно беа достапни.

Клауд-сервис компанијата Фастли од Сан Франциско го обзнани проблемот во 11 часот по централноевропско време и соопшти дека „продолжува да го испитува проблемот“.