Првиот човек на Русија, Владимир Путин, денеска изјави дека Европа ќе ја плаќа испораката на рускиот гас во рубљи и дека тоа ќе се случи што е можно поскоро.
Путин изјави дека „нема смисла да се испорачува стока од Руската Федерација во ЕУ и да се примаат стоки во нивната валута и дека плаќањето за гас ќе биде во рубљи“.
„Донесена е одлука плаќањата за испорака на гас во Европа да се претворат во рубљи што е можно поскоро“, изјавил рускиот претседател, пренесуваат медиумите во регионот.
Германија го критикува барањето на рускиот претседател Владимир Путин, кој рече дека Москва повеќе нема да прифаќа плаќања во долари и евра за испорака на гас за Европската Унија.
„Таквото барање значи раскинување на договорот“, изјави министерот за економија, Роберт Хабек, на прес-конференцијата во Берлин.
„Сега ќе разговараме со нашите европски партнери како ќе одговориме на ова барање“, додаде тој.
Германија е екстремно зависна од рускиот гас, кој сочинува 55 отсто од нејзиниот увоз на гас. И покрај руската инвазија на Украина, рускиот гас продолжува да пристигнува во ЕУ одбивајќи да воведе ембарго, како што направија САД и Велика Британија.
Берлин, сепак, сака бргу да ја намали својата зависност барајќи други доставувачи. За таа цел, германската влада ќе ја забрза изградбата на терминал за ЛНГ за увоз на течен гас.
Таа неодамна потпиша договор за долгорочна набавка со Катар, главен извозник на ЛНГ, по повод посетата на Хабек на земјата од Персискиот Залив минатиот викенд.
(Denar.mk)
(фото: Pxhere)
