Директорот на хрватската групација Rimac, Мате Римац, инвестираше во првите виртуелни градини во светот – градините Gruntek, и тоа е неговата прва приватна инвестиција во зелени решенија надвор од автомобилската индустрија.
Како што соопштија од Gruntek, многу бсе задоволни што Римац се придружиле да и помогне на компанијата во остварувањето на нивните големи планови за во иднина, односно излегување на странски пазари.
Воедно, ова е и првиот агропроект во кој инвестира Римац.
„На чекор сме од остварување на нашите планови за создавање позелена и поодржлива иднина. Gruntek го поттикнува урбаното население органскиот зеленчук да го набавува директно од производителите, без посредници. Транспарентно, поповолно и без создавање отпад од амбалажите и фрлање вишок храна од малопродажбата, што е неизбежно во трговските синџири. Gruntek нема такви проблеми. Во производството, дистрибуцијата и пакувањето не користиме пластика. Корисниците веќе се навикнати на природниот изглед и вкус на зеленчукот, па не планираат да се враќаат на масовното производство“ пишува на веб страницата на Gruntek.
Како што наведуваат, градините од иднината во светот на своите корисници им овозможуваат преку веб апликација директно да садат садници и да управуваат со својата градина, а потоа да уживаат во вистински органски зеленчук, додека во меѓувреме ги следат сите свои активности преку мобилен телефон.
Инвестицијата на Римац, за која не е позната сумата, ќе се искористи за нова фаза од развојот на градините во Хрватска, како и за подготовка за излегување на странски пазари, се вели во соопштението.
(Bizlife)
(фото: Gruntek)
