Во третиот квартал од 2023 година е забележан пораст на употребата на платежните картички и на мобилните апликации за електронско плаќање, покажуваат податоците на Народната банка.
Според податоците, во третиот квартал лани споредено со истиот квартал од претходната година е забележан раст од 12,8% бројот и 10% кај вредноста на трансакциите со платежни картички издадени во земјава.
-Притоа, значителен годишен раст од 15,1% е забележан кај употребата на картичките за плаќање производи и услуги во земјата, којшто се должи на посилниот раст на плаќањата на физичките места на продажба од 15,9%, но и солиден раст од 9,0% на плаќањата на виртуелните (интернет) продажни места – велат од Народна банка.
Во истиот период забележан е годишен раст од 9,3% на вредноста и од 5% кај бројот на остварени трансакции извршени со кредитни картички. И кај овие плаќања расте бројот на трансакции извршени електронски.
-Бројот на електронски иницираните платни налози во третиот квартал од 2023 година забележа годишен раст од 16,1%, што е повеќе за 10,8 п.п. од годишниот раст во третиот квартал од 2022 година (5,3%) – велат од Народна банка.
Лани споредено со претходната година, е зголемено и плаќањето преку апликациите на мобилните телефони каде што годишен раст изнесува 19,5%, како и кај употребата на компјутерите за извршување на плаќањата (11,8%).
