Поради зголемувањето на температурите стотици милиони луѓе до 2100 година би можеле да живеат во области со загадени подземни води, штетни по здравјето. Тоа значи дека оваа вода нема да може да се пие директно, без двоумење, туку мора да се преврие, објаснуваат од Технолошкиот институт во Карлсруе, Германија.
Во зависност од климатските услови, до 2100 година би можеле да бидат погодени до неколку стотици милиони луѓе. Температурата на подземните води игра клучна улога во квалитетот на водата, а истражувачите велат дека може да влијае на количината на штетни материи како што се арсен и манган.
Тие покачени концентрации може да имаат негативно влијание врз здравјето на луѓето, особено ако подземните води се користат како извор на вода за пиење, велат од универзитетот. Поради зголемената температура може да се шират болести како што е легионерската болест, а тоа ќе има и влијание врз биолошката разновидност.
Истражувачите истакнуваат дека претходно не се знаело доволно за влијанието на затоплувањето на почвата врз копнените води. Тимот од германскиот универзитет сега предвидува промени во глобалните температури до 2100 година. Резултатите беа објавени во јуни во научното списание Nature Geoscience.
Студијата анализира неколку сценарија – во едно температурата се зголемува за 2,1 степен, а во екстремното за дури 3,5 степени.
(Zimo)
(фото: Pickpik)
