Пред неколку години Марк Цукерберг реши да направи голема промена. Тој одлучи да ги стави социјалните мрежи, на кои се засноваше успехот на компанијата, во позадина, што резултираше со промена на името на компанијата од Facebook во Meta, при што Meta се однесува на метаверзумот или виртуелните светови за кои Цукерберг веруваше дека се иднината.
Иако не се откажа од метаверзумот, шефот на Meta со текот на времето ги смени приоритетите и го префрли фокусот на друга технологија – вештачкаta интелигенција. Неодамна објави дека сака да стане лидер на овој пазар до крајот на годината, а сега е појасно како мисли тоа да го направи. Meta, всушност, наскоро планира да воведе посебна мобилна апликација за својот четбот Meta AI базиран на вештачка интелигенција, што ќе го стави Цукерберг во директен конфликт со водечките компании на пазарот.
Оваа компанија во септември 2023 година го претстави четботот Meta AI како дигитален асистент достапен во постојните апликации и преку посебна веб-страница, но мобилната апликација сè уште не е воведена. Интересно е што минатиот месец еден корисник на социјалната мрежа Threads на Meta коментираше дека треба да направат посебна апликација за нивниот дигитален асистент, а самиот Цукерберг ја коментираше таа објава со ознака „100“, со што јасно стави до знаење дека се согласува со таа изјава.
Апликацијата Meta AI може да ја очекуваме во текот на вториот квартал од оваа година или помеѓу март и јуни годинава, според извори запознаени со ситуацијата, кои беа интервјуирани од новинарите на CNBC. На крилата на оваа апликација Цукерберг се надева дека Meta би можелa да стане лидер на пазарот на вештачка интелигенција до крајот на оваа година и да ги надмине моментално доминантните компании како OpenAI, Alphabet или Google, Microsoft и други.
Вакво нешто нема да биде лесно или едноставно, но Цукерберг има големи амбиции, а тие вклучуваат, меѓу другото, модел на претплата за Meta AI. Слично на тоа како OpenAI наплаќа за пристап до својата премиум верзија на четботот, Meta исто така треба да започне со тестирање на претплата. Секако, прво треба да соберат доволно голема корисничка база, во што треба да им помогне мобилната апликација.
(Zimo)
(фото: Meta AI)
