Белата куќа досега ги игнорираше загриженостите на инвеститорите, иако објавите за царини предизвикаа големи продажби на берзата, што ги избриша сите добивки на акциите од неговиот избор во ноември
Доналд Трамп се закани со воведување 200 отсто царина на вино и шампањ од земјите на Европската Унија, како најнова ескалација во глобалната трговска војна што ја започна американскиот претседател против најголемите трговски партнери на земјата, пренесува Гардијан.
Трамп преку објава на неговата платформа Трут Сошл, изјави дека царините на сите алкохолни производи од ЕУ ќе бидат одмазда за „гнасната“ давачка од 50% на бурбон виски што ја најави Европската Унија.
Мерката на Европската Унија против бурбон вискито – која треба да стапи на сила на 1 април – е дел од одговор вреден 26 милијарди евра на царините од 25% што Трамп ги воведе на увозот на челик и алуминиум, кои стапија на сила.
Белата куќа досега ги игнорираше загриженостите на инвеститорите, иако објавите за царини предизвикаа големи продажби на берзата, што ги избриша сите добивки на акциите од неговиот избор во ноември. Иако тој ја започна трговската војна, Трамп очигледно беше разлутен од одмаздничките мерки на ЕУ.
„Доколку оваа Царина не биде веднаш укината, САД наскоро ќе воведе 200% Царина на сите ВИНА, ШАМПАЊА И АЛКОХОЛНИ ПРОИЗВОДИ ШТО ДОАЃААТ ОД ФРАНЦИЈА И ДРУГИ ЗЕМЈИ-ПРЕТСТАВНИЦИ НА ЕУ. Ова ќе биде одлично за бизнисот со вино и шампањ во САД,“ напиша Трамп на својата социјална мрежа.
САД веќе ги заобиколуваат правилата за заштитено географско потекло на европските производи – американските супермаркети се полни со имитации произведени во САД на шампањ и други деликатеси, како пармезан и горгонзола.
Европските берзи паднаа поради загриженостите за влијанието на трговската војна. Францускиот индекс Cac 40 ги изгуби утринските добивки и падна за 0,3%, додека германскиот индекс Dax падна за 0,6%. Големите европски компании за пијалаци беа под притисок. Акциите на Pernod Ricard паднаа за речиси 4%, а Rémy Cointreau загуби 3,5%. LVMH, сопственикот на Moët & Chandon, падна за 1,4%.
(Мета)
Фото – Flickr
