Аеродромот Хитроу е затворен поради пожар кој избувна во трафостаница што предизвика прекин на струјата

Ова нарушување потсетува на доцнењата од 2023 година, кога британскиот систем за контрола на летање претрпе дефект, што предизвика одложувања и прекини на полетувањата и слетувањата низ целата земја на еден од најфреквентните денови за патување во годината

Британскиот аеродром Хитроу од утрово е целосно затворен откако пожар предизвика прекин на струјата, нарушувајќи летови за илјадници патници на најфреквентниот европски транспортен центар, пренесува Асошиејтед Прес.

Според сервисот за следење летови FlightRadar 24, најмалку 1.350 летови до и од Хитроу беа погодени, а последиците од хаосот ќе се чувствуваат уште неколку дена додека патниците се обидуваат да ги пререзервираат своите патувања.

При затворањето, околу 120 летови беа во воздух, од кои некои беа вратени назад, а други пренасочени кон аеродромот Гетвик близу Лондон, аеродромот Шарл де Гол во Париз или ирскиот аеродром Шенон, покажуваат податоците од системите за следење летови.

Хитроу во своето соопштение изјави дека ќе даде ажурирање за своите операции кога ќе има повеќе информации за тоа кога ќе биде вратено напојувањето со електрична енергија.

„За да ја одржиме безбедноста на нашите патници и колеги, немаме друг избор освен да го затвориме Хитроу“ за целиот ден, соопшти аеродромот. „Очекуваме значителни нарушувања во наредните денови, и патниците не треба да патуваат кон аеродромот под никакви околности додека не биде повторно отворен.“

Хитроу е еден од најпрометните аеродроми во светот за меѓународни патувања. Оваа година во јануари, аеродромот имаше рекорден број патници – повеќе од 6,3 милиони, што е зголемување од над 5% во споредба со истиот период минатата година. Јануари исто така беше 11-ти последователен месец со просечно над 200.000 патници дневно, при што аеродромот го наведе трансатлантскиот сообраќај како клучен фактор.

Ова нарушување потсетува на доцнењата од 2023 година, кога британскиот систем за контрола на летање претрпе дефект, што предизвика одложувања и прекини на полетувањата и слетувањата низ целата земја на еден од најфреквентните денови за патување во годината.

Јунтајтед Аирлајнс (United Airlines) соопштија дека седум од нивните летови се вратиле на почетната дестинација или биле пренасочени кон други аеродроми, а нивните летови кон Хитроу во петок биле откажани.

Според Централната новинска агенција на Тајван, најмалку два лета од Тајван до Лондон биле погодени. Лет на China Airlines што полетал наутро бил вратен назад кон Тајван, додека лет на EVA Air застанал во Бангкок, што било планирано слетување, додека авиокомпанијата ја проценувала состојбата во Лондон.

Singapore Airlines соопшти на платформата X дека нивниот ноќен лет за Лондон бил пренасочен кон Франкфурт.

Веб-страницата FlightAware покажа уште повеќе откажувања, вклучително два лета од JFK во Њујорк – еден на Delta Airlines и еден на American Airlines.

National Rail ги откажа сите возови до и од аеродромот.

Лондонската противпожарна бригада испрати 10 противпожарни возила и околу 70 пожарникари кои работеа на гаснење на пожарот неколку часа откако пламените јазици се издигнаа во небото при пожар во трансформатор на електрична подстаница во западен Лондон доцна во четврток навечер. Пожарот продолжи да тлее и по разденувањето.

(Meta)

Фото – Konstantin Von Wedelstaedt (GFDL 1.2 or GFDL 1.2), via Wikimedia Commons