За многу пациенти со шизофренија, други психијатриски болести или состојби како хипертензија и астма земањето на нивните лекови секој ден може да биде тешко. За да го надминат тој предизвик, истражувачит од Институтот за технологија на Масачусетс (МИТ) развија пилула која може да се пие само еднаш неделно и постепено го ослободува лекот од желудникот.
Во клиничкото испитување од фаза 3, спроведено од Lyndra Therapeutics, спинаут на МИТ, истражувачите користеле пилула еднаш неделно за да испорачаат широко користен лек за справување со симптомите на шизофренија. Тие откриле дека овој третман одржува конзистентни нивоа на лекот во телото на пациентите и ги контролира нивните симптоми исто како и дневните дози на лекот. Резултатите се објавени во списанието Lancet Psychiatry.
„Претворивме нешто што треба да се зема еднаш дневно во нешто што ќе се користи еднаш неделно, користејќи технологија што може да се прилагоди за различни лекови. Способноста да се обезбедат одржливи нивоа на лекови во текот на долг временски период, во систем кој е лесен за администрирање, го олеснува осигурувањето дека пациентите ги примаат своите лекови” вели Џовани Траверсо, вонреден професор по машинско инженерство на МИТ.
Системот за испорака на лекови има шест склопувачки краци, кои му овозможуваат да се вклопи во капсулата. Капсулата се раствора кога уредот ќе стигне до стомакот, дозволувајќи им на краците да излезат надвор. Откако ќе се подигнат краците, уредот станува преголем за да помине низ пилорусот (излезот на желудникот), така што слободно лебди во стомакот додека лековите полека се ослободуваат од рацете. По околу една недела, краците се раскинуваат сами по себе и секој сегмент излегува од желудникот и поминува низ дигестивниот тракт.
За клиничките испитувања капсулата била исполнета со “рисперидон”, најчесто препишан лек кој се користи за лекување на шизофренија. Повеќето пациенти го земаат лекот орално еднаш дневно.
Тимот на МИТ и Lyndre одлучија да се фокусираат на шизофренијата со надеж дека земањето лекови поретко, орално, може да го олесни лекувањето на пациентите и нивните старатели.
Студијата од фаза 3 била координирана од истражувачи од Lyndra и вклучувала 83 пациенти на пет различни локации низ САД. Четириесет и пет од пациентите ја завршиле целосната петнеделна студија, за време на која земале една капсула “рисперидон” неделно.
За време на студијата истражувачите ја мереле количината на лекот во крвотокот на секој пациент. Секоја недела тие забележувале нагло зголемување на денот кога се пиела пилулата, проследено со бавно опаѓање во текот на следната недела. Нивоата биле сите во оптималниот опсег и имало помали варијации со текот на времето отколку што се гледа кога пациентите земаат апчиња секој ден.
Користејќи ја проценката позната како скала на позитивен и негативен синдром (PANSS), истражувачите исто така откриле дека симптомите на пациентите останале стабилни во текот на студијата.
Истражувачите откриле дека несаканите ефекти од третманот биле минимални. Некои пациенти доживеале благ рефлукс на киселина и запек на почетокот на студијата, но тие не траеле долго. Резултатите, кои ја демонстрираат ефикасноста на капсулата и малкуте несакани ефекти, претставуваат важна пресвртница во овој пристап кон испорака на лекови, вели Траверсо.
Истражувачите сега се надеваат дека ќе завршат поголеми студии од фаза 3 пред да аплицираат за одобрение од американската Агенција за храна и лекови за овој начин на администрирање на “рисперидон”. Тие, исто така, се подготвуваат за испитувања во фаза 1 користејќи ја капсулата за испорака на други лекови, вклучително и контрацептивни средства.
(Vidi.hr)
