Пред неколку дена во Торино беше објавена листата со 50 најдобри ресторани во светот World’s 50 Best Restaurants, , а титулата најдобар ресторан во светот за оваа година ја доби ресторанот Maido од Лима, главниот град на Перу.
Ресторанот го води познатиот готвач Мицухару Цумура, син на јапонски имигранти кој се школувал во САД, а потоа се обучувал во Јапонија. Неговиот ресторан Maido стана место каде што вкусовите на Перу се среќаваат со прецизни јапонски техники, комбинација која го воодушевува целиот свет.
Мицухару ја започнал својата кулинарска кариера со студирање во САД, по што се преселил во Осака за да ги научи сложеноста на јапонските кулинарски методи. Работел во ресторани како Seto Sushi, кој е специјализиран за суши, и Imo to Daikon, познат по својата изакаја кујна (јапонски таверни со различни јадења и пијалоци).
По враќањето во Перу, тој се вработил во хотелот Sheraton, каде што од менаџер на смена и сос готвач станал менаџер за храна и пијалаци. Меѓутоа, неговата вистинска страст, спојот на перуанската и јапонската кујна, довел до отворање на Maido во 2009 година, кога имал само 28 години.
Менито за дегустација на Maido Experience нуди повеќе од десет внимателно изработени јадења, кои се вистинска авантура за сетилата. Состојките доаѓаат од Андите, амазонската прашума и северниот брег на Перу. Менито, меѓу другото, вклучува и рамен со лигњи и амазонски колбас, морски полжави со пена од жолта чили пиперка, но и специјалитетот на Цумура, говедски ребра варени над 48 часа.
Цената на оваа гастрономска авантура се движи од 287 до 585 евра по лице, во зависност од менито.
(Bizlife)
(фото: Flickr/Wikimedia/Maido)
