Тим научници од МИТ и Политехничкиот универзитет во Мадрид ги тестираа можностите на ChatGPT како автономен пилот на вселенско летало, користејќи симулација инспирирана од популарната видеоигра Kerbal Space Program.
Додека модели како ChatGPT се познати по тоа што погрешно ги решаваат едноставните логички задачи и „халуцинираат“ информации, се покажува дека овој голем јазичен модел може изненадувачки добро да се справи во вселенска средина.
Како дел од предизвикот наречен Kerbal Space Program Differential Game Challenge, научниците создадоа средина во која различни системи на вештачка интелигенција мораа да контролираат „летачки брод во потрага“, симулација на вселенски брод што брка цел. Во натпревар помеѓу неколку автономни агенти, ChatGPT, со само неколку влезни инструкции, успеа да го заземе второто место, веднаш зад систем базиран на конвенционални физички равенки за вселенско патување.
Интересно е што истражувањето е спроведено пред да биде објавен моделот GPT-4, што укажува дека посовремените верзии би можеле да се покажат уште подобро.
Сепак, научниците предупредуваат дека ваквите модели на вештачка интелигенција сè уште не се доволно сигурни за вистински мисии. Халуцинациите и измислувањето факти и лажните одговори сè уште претставуваат сериозен ризик, особено во контекст на вселенските мисии каде што грешките не се простуваат.
Заклучокот е дека иако вештачката интелигенција покажува огромен потенцијал во автономната контрола на вселенските летала, засега е најдобро улогите на пилот и навигатор во длабоката вселена да се остават во човечки раце, барем додека вештачката интелигенција не научи да го разликува Марс од фикцијата.
(Futurism)
(фото: Needpix)
