Франција и Велика Британија се придружија на најновата рекапитализација на Eutelsat, европската алтернатива на американскиот Starlink, а раководството се надева на финансиски инјекциии од други европски земји, првенствено од Германија.
Франција ја предводи најавената рекапитализација на Eutelsat, во две фази, со планиран вкупен износ од 1,5 милијарди евра, која се очекува да биде одобрена од акционерите во текот на денот.
Париз подготви 750 милиони евра за рекапитализација, што ќе и обезбеди на француската држава удел од 29,65%. Велика Британија објави ќе инвестира 163 милиони евра, што ќе обезбеди удел од 10,89%.
Раководството на Eutelsat се надева дека примерот на Париз ќе го следат и други европски земји.
Акционерите на компанијата во моментов се Bharti Space на индискиот милијардер Сунил Митал, како и француската бродска група CMA CGM и инвестицискиот фонд на француската осигурителна група Fonds Strategique de Participations.
Француско-британскиот сателитски оператор се најде во фокусот на европските земји оваа година бидејќи политиката на американскиот претседател Доналд Трамп го отвори прашањето за зависноста од американските сателитски компании.
Eutelsat е меѓу најсериозните европски конкуренти на американскиот Starlink, но му е потребна политичка поддршка, нагласи Кристоф Грудлер, француски член на Европскиот парламент, кој ја повикува Европската комисија да започне да бара нови европски кандидати за обезбедување сателитски комуникациски услуги на Украина во војната против Русија.
“Француската одлука за зголемување на уделот е силен политички чин, но не смееме да застанеме тука. Германија и другите земји-членки исто така треба да се вклучат бидејќи една земја не може да ја носи амбицијата на европскиот континент да оди во вселената на своите рамена”, изјави Грудлер за Reuters.
И францускиот претседател Емануел Макрон ги повика другите земји и компании да инвестираат во Eutelsat, нагласувајќи ја важноста на тој потег за европскиот суверенитет.
Управата на Eutelsat потврди за Reuters дека неговата цел е да привлече инвестиции од други европски земји, забележувајќи дека преговорите се уште се во почетна фаза.
Првичните преговори меѓу Париз и Берлин се одржаа на Француско-германскиот совет на министри кон крајот на август, изјави раководството на Eutelsat за Reuters.
Француската и германската влада не одговорија на барањата на Reuters за коментар за ситуацијата, а учесниците во најновата рунда рекапитализација на Eutelsat одбија да коментираат.
Падот на француската влада на почетокот на септември нема директно да влијае на Eutelsat, изјави раководството, но на компанијата ѝ е потребна политичка стабилност и континуитет.
Политичките превирања и евентуалното одложување на францускиот буџет за 2026 година би можеле да претставуваат ризици за Eutelsat во следната фискална година, додаде раководството.
Новата финансиска инјекција треба да му помогне на Eutelsat да го намали долгот од 2,6 милијарди евра, но и да ја пополни констелацијата со испраќање 340 нови сателити во ниската земјина орбита, што треба да ги чини повеќе од две милијарди евра.
Смелата констелација на сателити само малку ќе го намали заостанувањето на Eutelsat зад Starlink, кој моментално има речиси осум илјади сателити во ниската орбита на Земјата, во споредба со нешто над 650 на OneWeb.
OneWeb е основана во 2012 година и доби 1 милијарда долари од британската влада и Bharti Global за да ја заврши сателитската констелација што ќе се спои со Eutelsat во 2023 година.
Француско-британската компанија ја заврши последната финансиска година со оперативна загуба од 909,2 милиони евра.
Обезбедувањето услуги на државите ѝ донесе на компанијата приходи од 211 милиони евра, што е зголемување од 24,1% во однос на претходната финансиска година, поради бранот на зголемена побарувачка од европските влади за домашни решенија што би ја намалиле нивната зависност од американските компании како Starlink.
Eutelsat нема намера да се натпреварува со Starlink или Caiper на Amazon на потрошувачкиот пазар, туку ќе се фокусира на сегментите во кои е конкурентен, изјави извршниот директор Жан-Франсоа Фалашер пред новинарите во август при презентирањето на својот годишен извештај.
Покрај услугите за државите, овие сегменти вклучуваат интернет конекција во летот и поморски услуги, објасни Фалашер.
(Reuters)
