Нискобуџетната авиокомпанија Ryanair објави дека од ноември ќе прифаќа само дигитални авионски билети. Компанијата ќе бара од патниците да се пријават онлајн и да го генерираат својот билет преку официјалната апликација „myRyanair“.
Почнувајќи од 12 ноември од сите патници на Ryanair ќе се бара да имаат билет за качување исклучиво во дигитален формат, достапен во нивната апликација. Преминот на овој формат првично беше планиран за почетокот на месецот, но беше одложен за да се избегне периодот на најголем сообраќај за време на училишните распусти во Велика Британија.
Авиокомпанијата вели дека оваа одлука е донесена бидејќи речиси 80% од нивните патници веќе користат дигитални билети. Тие исто така истакнуваат дека овој премин е во согласност со трендот во другите индустрии – како што се фестивали, концерти и спортски настани – кои веќе успешно се префрлија на билети само во дигитален формат.
„Преминот на Ryanair кон 100% дигитални билети ќе им обезбеди на нашите патници побрзо, попаметно и поеколошки искуство при патување“, изјави главниот директор за маркетинг на Ryanair, Дара Брејди.
Постојат исклучоци од ова правило, имено ситуации кога патникот не е во можност да генерира или да пристапи до својот дигитален билет во апликацијата – на пример, ако нема паметен телефон или батеријата му е слаба.
Во овие случаи Ryanair потврди дека патниците можат да побараат хартиен билет за влез во авионот на шалтерот за пријавување на аеродромот. Тој ќе биде издаден бесплатно, под услов патникот да се пријавил онлајн.
Истото правило важи и за летовите од Мароко, каде што локалните прописи бараат хартиени билети. Повторно, ако сте се пријавиле онлајн, билетот за влез во авионот ќе биде издаден бесплатно на шалтерот.
(Kamatica)
