Европската комисија (ЕК) објави дека ги казнила луксузните модни куќи Gucci, Chloé и Loewe со вкупно 157 милиони евра за кршење на правилата за конкуренција.
ЕК ги обвини компаниите за ограничување на можноста на нивните независни дистрибутери слободно да ги одредуваат цените на своите производи, што резултирало со високи цени за крајните потрошувачи, што е прекршување на законот за конкуренција.
Трите компании ги извршиле прекршоците независно една од друга, но во периоди на преклопување, и во физички продавници и онлајн. Комисијата соопшти дека со оваа казна сака да испрати силна порака до целата модна индустрија.
Казните, сепак, се пониски од максималните износи предвидени со европските регулативи, со оглед на тоа што компаниите соработувале за време на истрагата спроведена од службите на ЕК. Најголемата казна ѝ беше изречена на италијанската модна куќа Gucci, од речиси 120 милиони евра.
Францускиот бренд Chloé ќе мора да плати казна од 20 милиони евра, а шпанската куќа Loewe 18 милиони евра.
- (Kamatica)
