Од 1 јануари 2026 година, бугарскиот лев ќе биде избришан од листата на валути со кои се тргува на српскиот девизен пазар.
Извршниот одбор на Народната банка на Србија донесе Одлука за измени на Одлуката за видовите странски валути и ефективни странски пари што можат да се купуваат и продаваат на девизниот пазар, која ќе стапи на сила на 1 јануари 2026 година, а со која се брише валутата на Република Бугарија – бугарскиот лев – од листата на валути со кои се тргува на девизниот пазар на Република Србија.
Одлуката за бришење на бугарскиот лев од листата на валути со кои се тргува на домашниот девизен пазар е донесена земајќи го предвид влегувањето на Република Бугарија во еврозоната од 1 јануари 2026 година, со што нејзината национална валута се заменува со еврото.
Со стапувањето во сила на Одлуката, почнувајќи од 1 јануари 2026 година, Народната банка на Србија ќе престане да го објавува курсот на динарот во однос на бугарскиот лев на курсната листа за официјалниот среден курс на динарот и курсната листа за девизи.
Бугарија е членка на ЕУ од 2007 година и е првата балканска земја што би можела да го усвои еврото по Хрватска во 2023 година.
Бугарските банки, исто така, потврдија дека сите банкомати во земјата ќе издаваат евра од 1 јануари 2026 година, со што официјално започнува транзицијата на земјата кон заедничката европска валута.
Фото – Pixnio
