Amazon и Google во неделата претставија заеднички развиена мултиклауд мрежна услуга за да се справат со растечката побарувачка за сигурна интернет конекција, соопштија компаниите.
Во време кога дури и кратките прекини можат да предизвикаат големи проблеми, новата иницијатива им овозможува на корисниците да воспостават приватни, брзи врски помеѓу нивните облачни платформи за неколку минути, процес што претходно траеше со недели, објави Ројтерс.
Услугата доаѓа нешто повеќе од еден месец по прекинот на AWS (Amazon Web Services) на 20 октомври што ги наруши илјадници веб-страници низ целиот свет и привремено ги отстрани популарните апликации како Snapchat и Reddit. Според проценката на компанијата Parametrix, тој инцидент ќе ги чини американските компании помеѓу 500 и 650 милиони долари.
Новата услуга ги комбинира AWS Interconnect–multicloud и Google Cloud Cross-Cloud Interconnect за да се подобри меѓусебната мрежна компатибилност. Според AWS, тоа е „фундаментална промена во мултиклауд конективноста“. Google Cloud изјави дека споделената мрежа ќе им го олесни на корисниците преместувањето податоци и апликации помеѓу различни облачни средини. „Сејлсфорс“ е меѓу првите корисници на новиот пристап, објави „Гугл Клауд“.
„АВС“ останува најголемиот светски давател на услуги во облак, пред „Мајкрософт Азур“ и „Гугл Клауд“, обезбедувајќи компјутерска моќ, складирање на податоци и други дигитални услуги за бизниси, влади и поединци. Технолошките гиганти „Алфабет“, „Мајкрософт“ и „Амазон“ инвестираат милијарди долари во инфраструктура што може да се справи со експлозивен раст на интернет сообраќајот и побарувачката за вештачка интелигенција.
Фото – Wikimedia
