Оваа активност е дел од пошироката мисија на CTRI и училиштето „Димитар Влахов“: да се создаде инклузивна образовна средина каде секое дете, без разлика на попреченоста, има можност да истражува, гради, создава и учи преку допир, звук и непосредно искуство
Здружението Center for Technology, Robotics and Innovation – CTRI, на ден 05.12.2025 година, во тесна соработка со Државното училиште за деца и младинци со оштетен вид „Димитар Влахов“ – Скопје, успешно ја реализираше втората инклузивна STEM работилница во рамки на иницијативата „ЛЕГО инклузија: Сетилен пат до иновација“.
Работилницата се одржа во неделата кога се одбележува 3 декември – Меѓународниот ден на лицата со попреченост, како силна и конкретна порака дека инклузијата во образованието не е идеја, туку пракса која се гради секојдневно — преку соработка, адаптација и доверба.
Оваа активност е дел од пошироката мисија на CTRI и училиштето „Димитар Влахов“: да се создаде инклузивна образовна средина каде секое дете, без разлика на попреченоста, има можност да истражува, гради, создава и учи преку допир, звук и непосредно искуство.
Наука што се чувствува со дланките
Темата на втората работилница беше „Музички вибрации“, каде учениците истражуваа како вибрацијата создава звук преку допир, слушање, градба и програмирање на LEGO Education SPIKE™ Essential модели.
Благодарение на специјално подготвени тактилни инструкции, прецизно организиран распоред на елементите и прилагодена методологија, учениците можеа самостојно да:
- градат функционални LEGO модели,
- следат чекор-по-чекор упатства,
- програмираат мотор кој создава ритам и вибрации,
- и да ја почувствуваат науката преку сите сетила.
„Ова не е само работилница – ова е чекор кон вистинска инклузивна образовна пракса, каде наставата се приспособува на потребите на детето, а не обратно“, порачуваат од CTRI, истакнувајќи дека токму ваквите соработки со образовните институции го менуваат пристапот кон STEM образованието во Македонија.
Во рамки на активноста учениците:
- градеа LEGO модел кој создава звук преку вибрации,
- учеа како функционираат различни музички инструменти,
- ги користеа допирот, слухот и движењето за разбирање на научни појави,
- развиваа самостојност и сигурност преку тактилно организирање на материјалите,
- учествуваа активно во целосно инклузивно STEM искуство.
Оваа работилница претставува втора успешно реализирана активност од серијата инклузивни образовни содржини што CTRI, заедно со ДУ „Димитар Влахов“, ги развива со цел долгорочно унапредување на инклузијата во STEM образованието.
„Веруваме дека секое дете има право да учи, да истражува и да создава. Ова е почеток на една поголема промена во начинот на кој ја замислуваме инклузијата во нашето општество,“ додава тимот на CTRI.
