Европските министри за финансии во петокот постигнаа привремен договор за воведување фиксна царина од три евра за мали пакети, која ќе се применува од 1 јули 2026 година и најтешко ќе ги погоди кинеските онлајн трговци. Станува збор за пакети во вредност помала од 150 евра, што претставува 93 проценти од е-трговијата во ЕУ.
Според Европскиот економски и социјален комитет, 12 милиони мали пакети облека, козметика и играчки нарачани од Кина преку онлајн продавниците SheIn и Temu влегуваат во Европа секој ден.
Службениците велат дека прагот од 150 евра ги става европските трговци во неповолна положба и претставува ризик за здравјето и безбедноста.
Кинеските онлајн продавници се обвинети дека не ги почитуваат стандардите на ЕУ за здравје и безбедност.
SheIn и Temu продаваат стоки преку своите апликации од производители чии трошоци се пониски, делумно затоа што не мора да спроведуваат исто тестирање како производителите од ЕУ или да рециклираат вратена стока како што е случајот во Европа.
Привремениот договор за воведување царина од три евра останува на сила сè додека не се укине регулативата што ги ослободува ваквите пакети од царински давачки.
Министрите за финансии се согласија во ноември да го укинат правилото што дозволува стоки во вредност помала од 150 евра да влезат во ЕУ без плаќање царински давачки. Оваа одлука ќе стапи на сила откако ќе се воспостави Царинскиот центар за податоци на ЕУ, централна платформа за интеракција со царината и зајакнување на контролите, што се очекува во 2028 година.
Формирањето на овој центар во моментов е во процес на преговори меѓу Советот на ЕУ и Европскиот парламент како дел од поширока фундаментална реформа на царинската рамка на ЕУ. Откако ќе стане целосно оперативен, овој центар ќе овозможи царинските давачки да се применуваат на сите пакети што влегуваат во ЕУ.
(Zimo)
