Нелсон Јанг се свртува кон историјата на Тајван за да го трансформира скромното растение банана во иновативен и одржлив текстил. Иако Тајван денес е познат како водечки светски производител на полупроводници, некогаш ова жолто овошје, кое сè уште масовно се одгледува, беше симбол на национална гордост, пишува Ројтерс.
Kомпанијата на Јанг, „Од фарма до материјал“, лоцирана во руралниот дел на Чангхуа, развива метод за претворање на влакната од банана во текстил што еден ден би можел да заврши во производите на глобалните брендови за спортска обувка. Мотивацијата дојде од побарувачката на пазарот за поодржливи решенија.
„Уште во 2008 година, европските брендови за патики ни кажаа дека се надеваат дека ќе најдат начин за паралелно производство на храна и материјали, што значи дека и двете ќе доаѓаат од истата почва“, рече Јанг. „Работиме врз основа на тој концепт. Сите наши материјални извори доаѓаат од храна или остатоци од земјоделството и прехранбената индустрија. Потоа ги претвораме овие остатоци во корисни материјали.“
Од „банана кралство“ до одржлива ткаенина
За време на јапонското колонијално владеење (1895 – 1945), Тајван бил познат по овошјето, а во 1960-тите се брендирал како „банана кралство“ за да го зголеми извозот, кој оттогаш е засенет од технолошката индустрија. Компанијата на Јанг го користи централниот дел од растението банана, таканареченото псевдостебло, кое обично се остава на полињата откако ќе се собере овошјето. Овој остаток се дроби и суши за да се добијат влакна погодни за изработка на облека.
Добиените влакна се користат за производство на предиво кое може да се меша со памук за изработка на чорапи, а може да се преработи и во веганска кожа. Иако проектот е сè уште во рана фаза и без конкретни нарачки, експертите гледаат голем потенцијал.
„Банана влакната се подобри од обичниот памук во однос на потрошувачката на вода, апсорпцијата на влага и стабилноста на снабдувањето, што ги прави многу ветувачки за идни апликации“, рече Шарлот Чианг, директорка за иновации и одржлив дизајн во Тајванската текстилна федерација. „Банана влакната би можеле да станат новиот адут на Тајван во областа на текстилните влакна од биомаса“, заклучи таа.
Фото – Needpix
