Астрономите открија планета со големина на Земјата на околу 146 светлосни години оддалеченост, за која научниците проценуваат дека има 50% шанси да се наоѓа во населливата зона на својата ѕвезда.
Планетата, наречена HD 137010b, орбитира околу ѕвезда слична на Сонцето и се проценува дека е околу 6% поголема од Земјата, објавува The Guardian.
Планетата има орбита од околу 355 дена, слична на Земјината, но нејзината ѕвезда е поладна и потемна од Сонцето, што би можело да значи дека температурата на површината на планетата би можела да биде дури минус 70 степени Целзиусови.
Меѓународен тим научници од Австралија, Велика Британија, САД и Данска ја идентификуваа планетата користејќи податоци собрани во 2017 година за време на продолжената мисија на вселенскиот телескоп Кеплер (K2) на НАСА, а нивното откритие е објавено во весникот Astrophysical Journal Letters.
Сигналот е снимен кога планетата накратко поминала пред својата ѕвезда, а првично бил забележан од граѓански истражувачи како дел од проектот „Ловци на планети“.
Научниците нагласуваат дека ги провериле податоците повеќе пати и дека откривањето се совпаѓа со типичниот транзит на планета.
Астрофизичарите кои не биле вклучени во истражувањето наведуваат дека откритието е значајно, но предупредуваат дека се потребни повеќе набљудувања на транзитот за потврда.
Исто така, се наведува дека планетата, иако слична по големина на Земјата, може да биде и голем леден свет, со голем дел од нејзината вода во замрзната состојба.
(021)
