Роботските такси треба да бидат побезбедни од човечките возачи – тоа е нивната примарна намена. Но, се чини дека Tesla не ја сфатил пораката. Имено, производителот на автомобили, во сопственост на Илон Маск, пријави пет нови несреќи во кои учествувале неговите роботакси, со што вкупниот број на документирани несреќи се искачи на 14 откако услугата е лансирана во Остин минатиот јуни.
Новопријавените несреќи, кои Tesla ги поднесе минатиот месец, се случиле помеѓу декември 2025 и јануари 2026 година. Тие вклучуваат судир со неподвижен објект со брзина од 27 км/ч, судир со автобус додека роботското такси било неподвижно, судир со камион со брзина од околу 6 км/ч и два инциденти во кои возилото удрило во столб или дрво додека се движело наназад.
Бидејќи Tesla ги цензурира своите извештаи опширно, невозможно е да се добие јасен увид во околностите и причините за овие несреќи.
Сепак, никаква цензура не може да го скрие фактот дека таксите се вклучени во несреќи со алармантна стапка. Според пресметките на Electrek, оваа стапка не е само полоша од конкуренцијата, туку и полоша од човечките возачи што треба да ги надминат.
Врз основа на податоците за километражата од извештајот на Tesla за четвртиот квартал од 2025 година, Electrek проценува дека флотата на роботски такси поминала околу 800.000 милји (приближно 1,28 милиони километри) од средината на јануари. Со вкупно 14 судири, тоа значи една несреќа на секои 57.000 милји.
За споредба, сопствениот извештај за безбедност на возилата на Tesla наведува дека просечниот американски возач доживува мала несреќа на секои 229.000 милји. Тоа значи дека роботските такси на Tesla се вклучени во несреќи четири пати почесто од луѓето.
Работите изгледаат уште полошо за Trsla во споредба со Waymo, компанијата со која Маск постојано се обидува да се натпреварува, тврдејќи дека неговите автономни автомобили се супериорни. Waymo има просек од една несреќа на секои 98.000 милји, врз основа на повеќе од 127 милиони милји поминати во целосно автономен режим.
И дури и оваа значајна разлика е во корист на Tesla. Waymo има флота од повеќе од 2.000 роботски такси, додека Tesla има помалку од педесет. Waymo работи во неколку големи американски градови, додека Tesla е ограничен на мала површина во само еден.
Исто така, возилата на Waymo се сметаат за целосно автономни, без безбедносен возач во кабината, додека Tesla наводно користела возила за придружба на човечки погон за да го исполни ветувањето на Маск за возење без екипаж. Накратко, Waymo и Tesla едноставно не се во иста лига.
Новите несреќи не се единствената загриженост во ажурирањето на NHTSA. Tesla, исто така, тивко го промени извештајот за несреќата од јули 2025 година, која првично беше опишана како несреќа со „само материјална штета“.
Во новата верзија, поднесена во декември, сериозноста на повредата беше променета во „мала повреда со хоспитализација“. Значи, на Tesla ѝ беа потребни речиси шест месеци за правилно да пријави дека во една од несреќите имало повредени.
Ова доцнење не е изолиран инцидент. NHTSA претходно ја истражуваше Trsla за постојано непријавување на несреќи на време, понекогаш и месеци откако се случиле.
Компанијата, исто така, опширно ги цензурира своите извештаи, криејќи клучни детали како што се описи на несреќи под изговор за заштита на „доверливи деловни информации“. Иако оваа практика е легална, таа е многу сомнителна. Како што забележува Electrek, Tesla е единствената компанија за роботски такси што систематски ги цензурира овие детали во сите свои поднесоци до NHTSA.
(Index.hr)
