Цените на суровата нафта нагло паднаа, паѓајќи далеку под нивото од 100 долари за барел, откако американскиот претседател Доналд Трамп објави дека САД се согласиле на двонеделен прекин на огнот со Иран предложен од Пакистан, пишуваат светските агенции.
Трамп појасни дека договорот е условен од тоа Иран да дозволи „целосно“ повторно отворање на Ормутскиот теснец. Речиси целосната блокада на тој воден пат – низ кој минува приближно една четвртина од светската поморска трговија со нафта – доведе до најголемото нарушување во историјата на пазарот на нафта.
Цената на глобалните фјучерси за сурова нафта Брент падна за околу 16 проценти на околу 92 долари за барел. Сепак, таа е сè уште далеку над нивото од околу 73 долари, на кое беше непосредно пред почетокот на конфликтот кон крајот на февруари. Американската референтна сурова нафта WTI падна за околу 19 проценти на околу 92 долари за барел.
Клучното прашање сега е дали превозните компании ќе имаат доволно доверба во безбедното минување низ тесниот воден пат покрај брегот на Иран за да продолжат да испорачуваат нафта, течен природен гас и други производи. Физичкиот пазар на нафта останува во превирања, бидејќи производителите од Блискиот Исток го намалија производството поради прекинување на извозните рути.
По веста за примирјето, фјучерсите на Dow Jones пораснаа за повеќе од 900 поени или 1,95 проценти, S&P 500 порасна за 2,13 проценти, а Nasdaq за 2,46 проценти. Позитивниот тренд се прошири и на азиските пазари, каде што во среда наутро јапонскиот Nikkei 225 порасна за 4,4 проценти, а јужнокорејскиот Kospi за дури 5,6 проценти.
И покрај оптимизмот на инвеститорите, аналитичарите предупредуваат дека клучните прашања остануваат отворени, првенствено дали блокадата на теснецот, низ кој минуваат околу 20 проценти од светската нафта, навистина ќе биде укината.
Фото – Raw Pixel
