На средбата на министрите за трговија на Г7 во Париз всушност требаше да се разговара за заеднички одговори на клучните предизвици за глобалната трговија – како што се последиците од кризата на Блискиот Исток. Сепак, состанокот беше засенет од најновата закана на Трамп дека може да воведе царини од 25% за европските автомобили уште оваа недела.
Американскиот претседател го оправда ова тврдејќи дека Европската унија не ги исполнува своите обврски според таканаречениот договор од Тернбери. Имено, Брисел и Вашингтон минатиот јули се согласија дека САД ќе воведат максимална царина од 15% за стоките од ЕУ, додека ЕУ ќе ги елиминира царините за американските индустриски производи, вклучувајќи ги и автомобилите. Политичарите на ЕУ и Европската комисија, која е задолжена за преговорите, ги отфрлаат тврдењата дека ЕУ не го почитува својот дел од договорот.
Пред состанокот на Г7, европскиот комесар за трговија, Марош Шефчовиќ,се сретна со американскиот трговски претставник Џејмисон Грир во Париз. Според него, ЕУ мора да го исполни своето ветено намалување на царините за американскиот извоз, но и САД мора да се вратат на договореното ниво од 15 проценти, кое ги опфаќа сите.
Германската министерка за економија, Катарина Рајхе, исто така, рече дека ја искористила можноста да разговара со своите американски партнери. „Вистина е дека напредуваме во спроведувањето на заеднички постигнатиот компромис за царинскиот договор“, рече политичарката од христијанските демократи.
Автомобилската индустрија и извозот на возила, нагласи таа, се од централно значење за Германија. Министерката изрази умерен оптимизам дека проблемот ќе биде решен. Одговарајќи на прашање од DW, таа рече дека се во тек преговори за да се види дали неодамна објавените царини можат да се избегнат.
Според проценките на Килскиот институт за светска економија, германската автомобилска индустрија би била особено погодена. САД е втор најважен пазар за германските производители на автомобили по ЕУ. Симулациите покажуваат дека најавените царини би довеле до краткорочна загуба од речиси 15 милијарди евра и долгорочна загуба од речиси 30 милијарди евра. За веќе ослабениот економски раст на Германија ова би бил сериозен удар.
Поради големата изложеност на германската автомобилска индустрија, некои набљудувачи ја толкуваат најавата на Трамп како политичка одмазда за изјавите на канцеларот Фридрих Мерц за војната во Иран. Тој неодамна изјави дека САД се понижувани во преговорите со Иран. Владата на САД, исто така, го најави долгопланираното повлекување на дел од американските трупи од Германија, за што се шпекулираше веќе некое време.
Европскиот парламент двапати ја прекина работата за спроведување на договорот од Тернбери во последните месеци – поради заканата на Трамп за инвазија на Гренланд и одлуката на Врховниот суд на САД за царините. Преговорите се во тек, а Европскиот парламент инсистира на воведување заштитни механизми во случај САД да не ги исполнат своите обврски.
Планиран е и состанок на преговарачите од институциите на ЕУ, на кој брза комесарот за трговија Шефчович по самитот на Г7. Тој се надева на клучен напредок и продолжување на „позитивните разговори“ со американскиот трговски претставник Џејмисон Грир.
Европската комисија си постави цел да ги спроведе главните точки од Договорот од Тернбери до крајот на јули, првата годишнина од неговото потпишување.
Кога беше постигнат договорот, Европската унија нагласи дека тој ќе донесе стабилност и предвидливост во трансатлантските трговски односи. Сепак, најновите закани за царини фрлаат сенка врз тие надежи.
Пени Нас верува дека дури и конечното усвојување на договорот нема да ги запре ваквите потези, бидејќи царините остануваат една од омилените економски алатки за притисок на Доналд Трамп.
(N1)
