Кина потврди дека ќе купи 200 авиони „Боинг“ и ќе соработува со САД за намалување на царините, со што официјално ги објави деталите од договорот постигнат за време на минатонеделната посета на американскиот претседател Доналд Трамп на Пекинг.
Со договорот се става крај на речиси десетгодишната неофицијална забрана за продажба на авиони „Боинг“ на Кина, пишува CNN.
Кинеското Министерство за трговија објави дека САД и Кина преговараат за продолжување на трговското примирје кое истекува во ноември и дека ќе разговараат за рамка за меѓусебно намалување на царините за стоки во вредност од околу 30 милијарди долари.
Најавите се во согласност со очекувањата што претставниците на администрацијата на Трамп ги изразија минатиот петок, по дводневниот самит меѓу Трамп и кинескиот лидер Си Џинпинг. Кина, исто така, изјави дека ќе соработува со САД за проширување на двонасочната трговија со земјоделски производи.
Дополнително, беше објавено дека ќе се обезбеди стабилност на снабдувањето со ретки земни метали во глобалните синџири на снабдување, иако не беа прецизирани конкретни чекори за тоа како се планира да се постигне ова.
Фото – PickPik
