Од туристички даноци до дополнителни трошоци за мраз во пијалоци или сечење сендвичи – патувањето во Европа станува сè поскапо, а туристите сè повеќе се соочуваат со неочекувани трошоци. Најновиот пример доаѓа од Шпанија, каде што на плажа се тестираат тушеви што се наплаќаат по минута користење.
На плажата Коста де ла Луз, во градот Маталаскањас во Шпанија, се тестираат таканаречени „паметни тушеви“, кои можат да се платат во готово или со скенирање QR код.
Мерката е воведена со цел да се намали потрошувачката на вода, а се проценува дека една минута туширање ќе чини околу едно евро. Ова значи дека едно четиричлено семејство би можело да потроши околу четири евра само за да ја исплакне солта по еден ден на плажа.
Новата практика не наиде на одобрување од локалното население.
Сепак, ова не е единствениот дополнителен трошок со кој се соочуваат туристите денес низ Европа. Во Италија не е невообичаено на сметката да се појави ставка од coperto, т.е. надомест за сервирање, користење прибор за јадење и седење во ресторан.
Иако во Србија се подразбира дека маса, прибор за јадење и корпа за леб се вклучени во цената, во Италија оваа услуга често се наплаќа дополнително, обично неколку евра по лице.
Некои туристи известуваат дека им се носи леб или грицки со пијалоците што не ги нарачале, кои подоцна се додаваат на сметката.
Престојот на плажа во многу европски одморалишта повеќе не е бесплатен, особено ако сакате лежалка и чадор.
Цените значително се зголемија на некои плажи во Палма, Мајорка ова лето. Стандарден сет лежалки и чадори за сонце сега чини околу 10 евра на ден, додека премиум лежалките чинат 45 евра. Изнајмувањето луксузен балинески кревет може да чини до 70 евра на ден.
Сè повеќе ресторани се обидуваат да ги обесхрабрат гостите да делат оброк. Едно семејство во австриската покраина Горна Австрија беше изненадено кога прочита известување во пицерија дека пиците се „наплаќаат по лице“, што го прави практично невозможно да се дели оброк.
Дополнително, некои ресторани во Австрија наплаќаат дополнителнс чинија за споделување храна, што може да биде до 8 евра.
Сличен случај беше пријавен во Италија, каде што еден бар на езерото Комо предизвика многу реакции откако им наплати на гостите две евра само за да исечат сендвич на два дела.
Мразот во пијалокот повеќе не е вклучен во цената.
Туристка на шпанскиот Коста дел Сол нарачала ладно кафе и забележала на сметката дека ѝ биле наплатени дополнителни 50 центи за две коцки мраз.
Сопствениците на ресторани објаснуваат дека зад навидум незначајниот додаток стојат трошоци за индустриски машини за мраз, електрична енергија, персонал и одржување на објектот, поради што некои одлучуваат да наплаќаат дополнително за мраз.
Иако повеќето гости очекуваат постелнината и крпите да бидат вклучени во цената на сместувањето, некои апартмани и хотели наплаќаат за овие услуги одделно.
Еден турист опиша како сфатил дека постелнината и крпите се дополнителен трошок дури по пристигнувањето во хотел во Фиренца, бидејќи оваа информација била наведена со ситни букви при резервацијата.
Друг гостин изјавил дека за време на престојот во Рим платил дополнителни 34 евра за постелнина и крпи за три лица.
Иако поединечните трошоци честопати изгледаат симболични, нивниот збир може значително да ја зголеми вкупната цена на патувањето. Затоа, експертите советуваат туристите внимателно да ги прочитаат условите за користење и ценовниците пред да резервираат сместување или да одат во ресторан, со цел да избегнат непријатни изненадувања на крајот од нивниот одмор.
(Bizlife)
(Pxhere)
