Главната италијанска рута за искачување на Монблан е привремено затворена поради нестабилност на глечерите предизвикана од неодамнешните топлотни бранови, објавија италијанските планински водичи.
Планинските водичи повеќе не ги водат алпинистите на рутата од безбедносни причини, додека другите рути се сè уште достапни.
Алекс Кампедели, претседател на Здружението на планински водичи Курмајор, рече дека условите на глечерот нагло се влошиле по високите температури во јуни.
Тој потврди за медиумите дека водичите минатата недела одлучиле повеќе да не ја препорачуваат рутата на алпинистите, но нагласи дека властите не вовеле официјална забрана за искачување и дека другите рути на италијанската страна од Мон Блан се сè уште отворени.
Курмајор, кој се наоѓа на надморска височина од околу 1.200 метри, е главната почетна точка за алпинистите кои се обидуваат да го освојат највисокиот врв на Алпите од италијанската страна.
Во последните недели на врвовите на Алпите се забележани невообичаено високи температури, кои го забрзуваат топењето на глечерите и го зголемуваат ризикот од лавини и лизгање на земјиштето.
На француската страна на Монблан, искачувањата во моментов се одвиваат без прекин. Сепак, можно е во одреден момент високите температури да ги принудат да ја донесат истата одлука како пред неколку години. Во 2022 година искачувањата по стандардната рута беа прекинати кон средината на јули поради ризикот од одрони на карпи.
Во Швајцарија планинските водичи исто така им советуваат на алпинистите од минатиот четврток да не ја користат класичната рута преку гребенот Хернли за искачување на Матерхорн, од истите безбедносни причини.
(021)
(фото: Picryl)
