Претседателот на Соединетите Американски Држави, Доналд Трамп, денес потпиша наредби со кои се воведуваат дополнителни тарифи од 50 проценти за неколку категории производи од Канада, поради „дискриминаторски третман на американските производи и индустрија“, објави Белата куќа.
Новите тарифи се однесуваат на неколку категории канадски стоки, а ќе стапат во сила 30 дена по потпишувањето на декретите, изјавија претставници на администрацијата во разговор со новинарите, објави CNBC.
„Со овој потег, претседателот Трамп воспоставува еднакви услови за клучниот американски извоз, вклучувајќи моторни возила, алкохолни пијалоци и млечни производи“, рече еден од претставниците.
Новите тарифи ќе бидат воведени според Член 338 од Законот за тарифи од 1930 година, кој му дава на претседателот на САД овластување да воведува тарифи до 50 проценти за производи од земји за кои се смета дека дискриминираат американски стоки. Тарифите ќе опфатат различни канадски производи, „од вино до стапови за хокеј и цемент“.
Односите меѓу САД и Канада, долгогодишни сојузници и трговски партнери, се влошија за време на мандатот на Доналд Трамп поради неговата политика на високи тарифи и критиките кон Договорот меѓу САД, Мексико и Канада (USMCA).
Администрацијата претходно овој месец објави дека нема да го обнови трговскиот договор, туку ќе започне серија годишни прегледи, зголемувајќи ја неизвесноста околу неговата иднина.
(B92)
Фото – Picpedia
