Акциите на „Унитри Роботикс“ скокнаа за 542 проценти во раното тргување во среда откако кинескиот производител на хуманоидни роботи излезе на берза во Шангај.
Компанијата од Хангжу, чии роботи способни да изведуваат превртувања наназад и танцување привлекоа светско внимание, собра околу 6,1 милијарди јуани (905 милиони долари) преку почетна јавна понуда (IPO), според проспектот.
Цената на акциите достигна 968,1 јуани по парче, откако накратко достигна и до 1.100 јуани претходно во текот на денот.
IPO-то беше поддржано и од кинеската компанија за вештачка интелигенција „ДипСик“, која инвестираше околу 140,8 милиони јуани, според официјалниот извештај на компанијата. Меѓу постојните инвеститори на „Унитри“ е кинескиот технолошки гигант „Тенсент“.
Производната палета на „Унитри“ вклучува двоножни хуманоидни роботи способни да одат и да манипулираат со предмети со вешти раце, како и четвороножни роботи што се користат за задачи како што е откривање на опасности.
Пред својата IPO, Unitree во понеделник претстави нов хуманоиден робот наречен Супермен, за кој тврди дека може да скокне два метри од место и да трча со брзина до 12,66 метри во секунда.
Unitree е најновата истакната кинеска технолошка компанија што се котираше на пазарот STAR во Шангај, по производителот на мемориски чипови CXMT минатиот месец, чии акции скокнаа за 466 проценти на првиот ден од тргувањето.
Банката Morgan Stanley во јуни ја зголеми својата прогноза за испораки на хуманоидни роботи во Кина на 50.000 единици оваа година, што е речиси двојно повеќе од претходната проценка од 28.000. Банката проценува дека кинескиот пазар на хуманоидни роботи ќе порасне од двете милијарди долари оваа година на 15 милијарди долари до 2030 година.
Се очекува пилот-проектите во Кина да се префрлат на поширока имплементација во втората половина од оваа година, при што се очекува хуманоидните роботи во полна големина да сочинуваат околу 30 проценти од испораките, а тој удел ќе се зголеми на 70 проценти до 2028 година.
Фото – веб страница на Unitree Robotics
