Порталот AirAdvisor спроведе обемна студија во која беа вклучени 23 европски авиокомпании за да се утврди кои превозници навистина нудат најдобра вредност за парите. Рангирањето се базира на клучен индикатор во авиоиндустријата – RASK (приход по расположиво седиште по километар), т.е. приходите што компанијата ги генерира по прелетан километар и достапно седиште. Оваа метрика ја вклучува не само рекламираната цена на билетот, туку и дополнителни трошоци како што се багаж и избор на седиште: колку е повисок RASK, толку е поскап летот со таа компанија во пракса.
Истражувањето покажува дека помалите, регионални превозници се убедливо најскапи бидејќи летаат на специфични, помалку чести рути и имаат повисоки оперативни трошоци. Од друга страна, споредбените податоци покажуваат и дека цените за повеќето европски превозници се малку намалени во споредба со претходната година.
Убедливо најскапата авиокомпанија на континентот е норвешкиот регионален превозник Widerøe, со RASK од дури 0,32 евра, првенствено поради летови до оддалечени локални аеродроми.
Кога станува збор за големи национални превозници, титулата најскапа ја држи British Airways (0,0888 евра), по што следат следниве на самиот врв по цена:
Air France(0,0850 евра)
Austrian Airlines (0,0850 евра)
Lufthansa (0,0845 евра)
Aegean Airlines (0,0839 евра)
На спротивниот крај од листата е унгарскиот нискобуџетен превозник Wizz Air, кој со RASK од само 0,0433 евра е официјално најевтината авиокомпанија во Европа. Со избирање на оваа компанија наместо, на пример, Air France, патниците на просечни европски линии можат да заштедат до 50 евра по лет.
Најпристапните превозници во Европа се:
Wizz Air (0,0433 евра)
easyJet (0,0521 евра)
Ryanair (0,0556 евра)
Меѓу традиционалните национални авиокомпании, Finnair (0,0622 евра) се покажа како најпристапен избор за патниците.
(Bizlife)
(фото: Pick Pik)
