Акциите на Meta Platforms скокнаа за речиси 12 отсто во понеделникот, откако Wells Fargo ја зголеми целната цена на акцијата, а инвеститорите беа дополнително охрабрени од новиот автономен асистент со вештачка интелигенција, Muse. Благодарение на овој раст, богатството на основачот на Meta, Марк Цукерберг, се зголеми за дури 25 милијарди долари за само еден ден, достигнувајќи проценети 253,6 милијарди долари.
Според состојбата во 14 часот по источно време во понеделникот, Цукерберг се наоѓаше на шестото место на листата на милијардери на Forbes. Околу 14,5 милијарди долари го делеа од петтопласираниот Сергеј Брин, чие богатство беше проценето на 268,1 милијарда долари.
Неговата проценета дневна заработка беше највисока меѓу десетте најбогати луѓе на листата на Forbes. Таа исто така го надмина растот на богатството на првопласираниот Илон Маск, кој истиот ден стана побогат за 12 милијарди долари.
Растот на акциите уследи откако Wells Fargo во понеделникот ја зголеми целната цена за Meta од 640 на 796 долари, задржувајќи ја препораката „overweight“ (надпросечен принос) пред конференцијата Meta Connect. Аналитичарите посебно ги издвоија податоците за користењето на Muse како еден од клучните показатели.
Meta го претстави Muse претходно овој месец. Станува збор за автономен асистент со вештачка интелигенција кој може да резервира патувања, да испраќа е-пораки и да управува со поврзани уреди во домот. Цукерберг го опиша како чекор кон обезбедување „лична суперинтелигенција“ за корисниците на платформите на Meta.
Свртувањето на Meta кон вештачката интелигенција всушност трае веќе повеќе од една деценија. Во 2013 година компанијата го лансираше одделот Facebook AI Research (FAIR), а во 2023 година го претстави големиот јазичен модел Llama, кој е конкурент на ChatGPT.
Минатата година Meta го интегрираше својот модел на вештачка интелигенција во WhatsApp, Instagram, Messenger и Facebook, овозможувајќи им на стотици милиони корисници пристап до асистент со вештачка интелигенција.
Цукерберг најави инвестиции вредни десетици милијарди долари за набавка на голем број напредни чипови од Nvidia и за развој на сопствени чипови. Денес Meta поседува една од најголемите приватни компјутерски инфраструктури за вештачка интелигенција во светот, а паралелно развива и уреди опремени со вештачка интелигенција, вклучувајќи очила, нараквици и слушалки.
(Forbes.hr)
(фото: Flickr)
