Во Берово ќе се гради првиот комплекс за здравствен и рекреативен туризам во регионот. Како што истакна Мишо Догазански од Одделението за урбанизам во Општина Берово, во тек е постапката за добивање одобрение за градба на комплексот.
„Според проектот, комплексот ќе се протега на 5,5 хектари, а ќе се гради по германски терк и архитектура. Локацијата е покрај регионалниот пат Берово-Струмица во непосредна близина на отклонот за Русиново. Инвеститор е фирмата ‚Боров еликсир’, зад која стои локален жител кој живее во Скопје, а коинвеститорот е од Германија. Овде се предвидени многу содржини за рехабилитација на лицата, има базен и сл.“ истакна Догазански.
Тој додаде дека интерес за инвестиции во туризмот има, а годишно Општината издава по десетина дозволи за градба и за индивидуални викенд куќи во населбата Беровско Езеро.
„Интерес за градба има. Има изградено околу 80 викендички кои се на Беровско Езеро, пред се на приватно земјиште, а некои од нив се пријавени за сместување гости. Најави за доградба има. Хотелот ‚Вип’ во моментов е во фаза на градба овде се доградува капацитет за околу 60-ина легла со што ќе го зголеми капацитетот на хотелот до 150 легла. Исто така и за хотелскиот комплекс ‚Аурора’ во процедура е изработка на планска документација за доградба на уште еден капацитет со што ќе се достигне капацитет од 200 легла“ рече Догазански.
Најголемиот адут за развој на туризмот и понатаму останува населбата Беровско Езеро.
„Туристичката населба Беровско Езеро е предвидена на 80 хектари површина и околу 3.000 индивидуални викенд куќи и површина од 25 хектари за хотелски комплекси. Претежно земјиштето е приватно, а единствено државно земјиште е на детското одморалиште и бунгаловите, кои, за жал, не работат“ потенцираше Догазански.
