Вицепремиерот за економски прашања Кочо Анѓушев се сретна со Џесмин Рахман, шеф на мисијата на Меѓународниот монетарен фонд и Себастиан Соса, раководител на канцеларијата на ММФ за Република Северна Македонија, во рамки на годишната мисија на ММФ за спроведување на годишниот економски преглед.
Според Анѓушев, во првиот квартал на 2019 година забележан е силен раст на бруто домашниот производ од 4,1%, како резултат на континуирани и комплементарни економски мерки со кои се стимулираат нови инвестиции, технолошки развој и внесување на иновации во компаниите, отворање на нови работни места и повисоки плати.
Тој додава дека растот на БДП во првиот квартал е резултат на реалната економија, растот на индустриското производство од 6,7%, растот на извозот на компаниите од 14,7%, отворените над 50.000 работни места во последните 2 години, од кои 16.700 само во првиот квартал на 2019 година, како и раст на платите од околу 6% на годишно ниво.
На средбата, како што соопштија од неговиот кабинет, Анѓушев ги презентирал мерките од програмата за економски реформи 2019-2021, со кои дополнително ќе се подобри бизнис климата во земјата и ќе се стимулира повисок и одржлив економски раст на земјата.
Претставничката на ММФ, Рахман, информирала дека се отвора нова регионална канцеларија на резидентен претставник за зајакнување на односите со Албанија, Косово, Црна Гора и Македонија, со седиште во Виена. Со оваа канцеларија ММФ планира да одржува блиски релации со четирите земји, како и со донаторите, меѓународните институции, вклучувајќи ја и Светска банка и австриската Влада, која е важен трговски и развоен партнер на регионот на Западен Балкан.
Новата регионална канцеларија ќе биде раководена од Стефани Ебле, која во моментов е шеф на мисијата на ММФ за Косово. Ебле претходно работела на Украина, Грција, Србија и Босна и Херцеговина. Таа ќе ги надгледува локалните тимови во постојните канцеларии во Албанија, Косово и Северна Македонија, кои ќе продолжат со работа и понатаму.
