На половина од европските видови дрвја им се заканува исчезнување

Речиси половина од видовите дрвја во Европа се во опасност од исчезнување, предупреди Меѓународната унија за зачувување на природата (IUCN).
Ова е прв пат оваа организација со седиште во Швајцарија да објави црвена листа со загрозени видови европски дрвја. IUCN ја анализирала судбината на 454 видови дрвја во Европа.
Во извештајот се наведува дека се загрозени 42% од видовите дрвја кои растат во Европа и на други места во светот. Загрозени се и 58% од ендемските видови, а критична е ситуацијата за 15% од дрвјата.
Воведувањето инвазивни видови, неодржливото сечење на шумите и урбаниот развој се главните причини зошто дрвјата се во опасност. Европските стебла се загрозени и поради болести и поради промените на екосистемите.