InnoTech Club е платформа чија основна мисија е зголемување на свесноста во македонското општество за значењето и важноста на науката, технологијата и иновациите како клучни фактори за идниот економски раст и развој на земјата!
Ниската стапка на економски раст, високата невработеност и малиот степен на индустријализација (уделот на индустријата во бруто-домашниот производ од 32% во 1992 година паднал на 15% во 2016 година) се силно поттикнати со континуираниот недостиг на стручна и добро обучена работна сила. Затоа, Советот на странски инвеститори во “Белата книга” од 2018 година ја потенцираше миграцијата на работоспособното население и недостигот на инженери и експерти со вештини од областа на науката, технологиите и иновациите како едни од најголемите предизвици за индустриското работење во земјава.
Затоа InnoTech Club ги адресира следните горливи проблеми:
- Како младите да се заинтересираат за наука, технологија и иновации?
- Како да ги мотивираме да работат на проекти применети во пракса?
- Како знаењето и иновациите да ги направиме IN?
- Како да ги задржиме експертите со силни технички вештини да градат кариери во Северна Македонија?
- Како кариерата во advance science, technology and innovation да биде привлечна и во нашата земја?
Кон остварување на овие цели, InnoTech Club обединува:
- Средношколци
- Студенти
- Универзитети
- Истражувачи и експерти
- Компании
- Истражувачки центри
- Стопански Комори
- Странски инвеститори
- Стартап компании
- Национални институции
Нашето мото е: Единствениот пат до одржлив економски развој и високи стапки на економски раст води преку наука, технологија и иновации!
Активности
InnoTech Club ќе се реализира во неколку фази:
Во првата фаза проектот ќе се презентира на целните групи кои се предмет на интерес на InnoTech Club. Презентации пред средношколците и студентите ќе се одржат во Американските катчиња и Кариерните центри на државните и приватните универзитети во државата, а преку директни состаноци ќе се анимираат менаџерите на домашните и странските компании. Во оваа фаза ќе се воспостави Борд на експерти составен од професори, стручњаци и менаџери на компании, кој ќе има советодавна улога.
Првиот голем kick-off настан на кој ќе се престави InnoTech Club ќе се одржи кон крајот на ноември 2019 година. На овој настан, домашни и странски експерти од областа на технологијата, иновациите и науката ќе го пренесат своето искуство на присутните средношколци, студенти и домашни и странски компании во Република Северна Македонија.
Во следните пет месеци InnoTech Club-от ќе организира Inno Café настани во Скопје, Штип, Тетово и Битола. На овие настани преку заедничко дружење и неформална презентација ќе се презентираат иновативни, научни и технолошки успешни проекти кои ги прават поединци или компании/институции во нашата земја. Овие настани ќе ни помогнат да се запознаеме, вмрежиме и инспирираме за нови заеднички иницијативи!
Со завршната конференција во мај 2020 година ќе ја презентираме InnoTech Club како think-tank организација која ќе продолжи да ја шири визијата за македонската економија базирана на знаење, иновации и напредни технологии!
Тимот на InnoTech Club
Д-р Игор Јорданов е професор на Технолошко-металуршкиот факултет при Универзитетот “Св. Кирил и Методиј“ во Скопје со богато искуство на истражувачки пректи во земјава и странство. Тој е меѓународно признаен научник кој има работено на Универзитетот во Љубљана во Словенија, Гент Универзитетот во Белгија и Texas A&M Универзитетот во САД. Во неговиот фокус на научна работа е производство на иновативни, паметни и напредни материјали со примена на еколошки технологии и обновливи материјали.
М-р Верица Јорданова е новинар со повеќе од 20-годишно искуство, претприемач, консултант, магистер по стратешки комуникации, основач и уредник на веб порталот www.inovativnost.mk. Таа има богато искуство во организирање и модерирање на бизнис настани во земјава и странство. Нејзиното искуство во промовирање на македонската иновативна, технолошка и стартап сцена ја етаблираше како одличен познавач на оваа сцена во земјава.
Д-р Зоран Марков е професор по механика на флуиди и хидроенергетика на Машинскиот факултет при Универзитетот “Св. Кирил и Методиј“ во Скопје, со меѓународно истражувачко искуство во Турбоинститут во Љубљана, Словенија, The Pennsylvania State University во САД, Универзитетот Ерланген во Германија, Vrije Универзитетот во Белгија, Норвешкиот Универзитет за наука и технологија и Аристотел Универзитетот во Грција. Неговото поле на експертиза е хидроенергетика, гасоводни системи и пречистителни станици за отпадни води.
Љубица Ангелкова е новинар, модератор, ПР експерт. Најголем дел од нејзината професионална кариера е врзан за телевизиско новинарство во Битола. Таа исто така е многу активна во волонтерски активности и бројни проекти на невладини организации, насочени кон креирање на подобро општество.
