За 10 отсто е намалено светското производство на вино

- Advertisement -

Мразот и сушата, особено во трите главни земји производители на вино Италија, Шпанија и Франција, се причина за намалување на производството за 10 отсто оваа година, покажуваат податоците на Меѓународната организација на винова лоза и вино. 

Годинава винарите од целиот свет произвеле меѓу 258,3 и 267,4 милиони хектолитри вино или 262,8 милиони хектолитри во просек, во споредба со 294 милиони во 2018 година, врз основа на проценка заснована на 28 земји и 85 отсто од светското производство.

- Advertisement -

По исклучително високиот обем на производство во 2018 година, производството оваа година се врати на просечното ниво од периодот 2007-2016 со исклучок на 2013 година, се наведува во соопштението на меѓународната организација со седиште во Париз.

Во Европската унија, обемот се намали за 15 отсто во однос на минатата година: 156 милиони хектолитри наспроти 182,7 милиони хектолитри лани. Од првите три винарски земји, најмногу страдаше Шпанија, со пад на производството од 24 отсто на 34,3 милиони хектолитри. Тоа, според организацијата, главно се должи на временските услови, односно многу студена и дождлива пролет и исклучително топло и суво лето.

- Advertisement -

Италија, чие производство се намали за 15 отсто на 46,6 милиони хектолитри, ја задржува првата позиција како најголем светски производител на вино по волумен. Во Франција, која е на второ место, обемот исто така се намали за 15 отсто на 41,9 милиони хектолитри.

Португалија, со 6,7 милиони хектолитри во 2019 година, е единствена земја во Европската унија која произвела повеќе вино од претходната година (10 отсто), над четири проценти од својот петгодишен просек.

Сподели!
- Advertisement -