Австралиската биотехнолошка компанија Ena Respiratory развива спреј за нос кој би можел да му помогне на човечкиот имунолошки систем во борбата против обичните настинки и грип, но и против корона вирусот.
Во студија спроведена на животни, спрејот, кој може да се користи во комбинација со вакцини, го намали бројот на вируси кои предизвикуваат КОВИД-19 за дури 96%. Охрабрувачките бројки треба да ги потврдат и клинички тестирања на луѓе, кои, како што велат од Ena Respiratory, може да почнат за помалку од четири месеци.
Еден од условите за почеток на клиничките тестирања е докажувањето дека спрејот не е штетен за луѓето и добивање на официјално одобрение. За потсетување, во неколку наврати научниците истакнуваат дека можеби најдобриот начин во борбата против корона вирусот и болеста КОВИД-19 е вакцина која би била администрирана директно на слузницата на носот во форма на спреј, за да може да делува на вирусот на местото каде што најчесто влегува во телото.
(Reuters)
(фото: Pixnio)
