Продажбата на нови едносемејни домови во Соединетите Американски Држави се намали за 7,3 проценти во мај во однос на претходниот месец и падна на најниско ниво за четири месеци, објави денес Бирото за попис на САД.
Продажбата беше со сезонски прилагодена годишна стапка од 580.000 единици, што е далеку под пазарните очекувања од 640.000 домови и е намалена во однос на ревидираните 626.000 единици во април, објави „Трејдинг економикс“. Аналитичарите велат дека повисоките хипотекарни каматни стапки продолжиле да влијаат врз пазарот на домување и го намалуваат интересот на купувачите за купување нови домови.
Регионално, најголем пад беше на Запад, каде што продажбата се намали за 26,9 проценти, додека Југот, најголемиот американски пазар на домување, се намали за 4,1 процент.
Во исто време, Североистокот забележа раст на продажбата од 3 проценти, додека продажбата на Средниот Запад се зголеми за 16,2 проценти.
Податоците исто така покажуваат дека понудата на нови домови продолжила да расте. Во мај на пазарот имало 496.000 нови станбени единици, што претставува доволно залихи за 10,3 месеци продажба со сегашното темпо, најмногу од глобалната финансиска криза во 2009 година.
Средната цена на продадените нови домови се искачи на 424.900 долари во април, во споредба со 416.500 долари во април, додека остана речиси непроменета во однос на истиот месец минатата година, пренесува Танјуг. Најновите податоци покажуваат дека американскиот пазар на недвижности продолжува да страда од високи трошоци за позајмување, и покрај постепеното зголемување на понудата на станови.
(Politika)
Фото – KLM Properties
