Двоцифрен процентуален раст во 2022 година има и бројот на стручни квалификации стекнати во друга земја, признати во Германија, а Босна и Херцеговина е прва по бројот на признати квалификации и дипломи. Минатата година во Германија се признаени 52.300 странски професионални квалификации, што е за 11 отсто повеќе од 2021 година (46.900).
Во времето на пандемијата на корона вирусот, тој број беше значително помал. Во 2022 година беа обработени вкупно 65.900 барања за признавање квалификација. Во претходната година се обработени 59.800 барања. Според податоците на Германскиот сојузен завод за статистика, бројот на признати професионални квалификации е речиси двојно зголемен од 2016 година. Таа година, само 26.200 квалификации стекнати во странство беа признати како целосни, или ограничени, еквивалентни на квалификациите стекнати во Германија. А бројот на нови барања за признавање на странски квалификации е зголемен во 2022 година во однос на 2021 година, за 13 отсто, или 49.500 барања.
Како и досега, околу една третина од сите стручни квалификации за кои е побарана нострификација се однесуваат на дејности од областа на здравството. Во Германија во 2022 година, од вкупно 21.000 признати квалификации во областа на медицинската нега и грижата за пациентите, огромното мнозинство од 18.500 се однесуваат на професијата медицинска сестра/медицински техничар.
Кога станува збор за земјите, БиХ беше на прво место со вкупно 4.500 признати професионални квалификации, пред Филипините (4.000) и Турција (3.800). Регионално признати се 9.900 квалификации од земјите на Европската унија, 19.300 од другите европски земји и 14.500 од Азија, а овие три региони се убедливо пред другите делови на светот.
Извор: Бета
